തിരുവനന്തപുരം: സ്വകാര്യ ആശുപത്രി നഴ്സുമാർ ശമ്പള പരിഷ്കരണം ആവശ്യപ്പെട്ട് നടത്തുന്ന അനിശ്ചിതകാല സമരം നാലാം ദിവസത്തിലേക്ക് കടന്നതോടെ സംസ്ഥാനത്തെ ആരോഗ്യമേഖല കടുത്ത പ്രതിസന്ധിയിൽ. അത്യാഹിത വിഭാഗം ഉൾപ്പെടെയുള്ള സേവനങ്ങൾ ബഹിഷ്കരിച്ചാണ് നഴ്സുമാർ പ്രതിഷേധിക്കുന്നത്. ആവശ്യങ്ങൾ അംഗീകരിക്കുന്നത് വരെ പിന്നോട്ടില്ലെന്ന് സമര സംഘടനകൾ പ്രഖ്യാപിച്ചപ്പോൾ, നിലവിലെ സമരം അനാവശ്യമാണെന്ന നിലപാടിലാണ് ആശുപത്രി മാനേജ്മെന്റുകൾ.
നഴ്സുമാരുടെ കൂട്ട അവധി മൂലം പല ആശുപത്രികളിലും ചികിത്സാ സൗകര്യങ്ങൾ തടസ്സപ്പെടുകയും ഇത് രോഗികളെ നേരിട്ട് ബാധിക്കുകയും ചെയ്യുന്നുണ്ട്. ഇതിനിടെ, ആശുപത്രികളുടെ പ്രവർത്തനം തടസ്സപ്പെടുന്നില്ലെന്ന് സർക്കാർ ഉറപ്പുവരുത്തണമെന്ന് ഹൈക്കോടതി നിർദ്ദേശിച്ചു. പ്രതിഷേധം മൂലം സുരക്ഷാ ഭീഷണിയുള്ള ആശുപത്രികൾക്ക് പോലീസ് സംരക്ഷണം നൽകണമെന്നും കോടതി സർക്കാരിനോട് ആവശ്യപ്പെട്ടിട്ടുണ്ട്. വരും ദിവസങ്ങളിൽ സർക്കാർ തലത്തിൽ ചർച്ചകൾ നടന്നില്ലെങ്കിൽ സമരം കൂടുതൽ ശക്തമാകാനാണ് സാധ്യത.
About the Author
