നെടുമ്പാശ്ശേരി വിമാനത്താവളത്തെ ലോകനിലവാരത്തിലുള്ള ഏവിയേഷൻ ഹബ്ബാക്കി മാറ്റുന്ന സിയാൽ എയ്റോപാർക്ക് പദ്ധതിയുടെ ഒന്നാംഘട്ടം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. കാലാനുസൃതമായ മാറ്റങ്ങൾ ഉൾക്കൊള്ളാനുള്ള സിയാലിന്റെ കഴിവും ഇച്ഛാശക്തിയുമാണ് അതിന്റെ വിജയരഹസ്യമെന്ന് ഉദ്ഘാടന പ്രസംഗത്തിൽ മുഖ്യമന്ത്രി വ്യക്തമാക്കി.
പ്രത്യേക സാമ്പത്തിക മേഖലയുടെ (SEZ) എല്ലാ സൗകര്യങ്ങളും വിമാനത്താവളത്തിൽ ലഭ്യമാക്കുന്നുണ്ടെന്നും, കഴിഞ്ഞ പത്ത് വർഷത്തിനിടയിൽ കേരളം കൈവരിച്ച വികസനത്തിന്റെ നേർചിത്രമാണ് നെടുമ്പാശ്ശേരി വിമാനത്താവളമെന്നും അദ്ദേഹം കൂട്ടിച്ചേർത്തു. ഡിജിറ്റൽ യുഗത്തിൽ കേരളം കൈവരിച്ച നേട്ടങ്ങളുടെ പ്രതിഫലനമാണ് ഇന്ന് കാണുന്ന ‘ഡിജിറ്റലി സ്മാർട്ട്’ ആയ സിയാലെന്നും മുഖ്യമന്ത്രി പറഞ്ഞു.
വിമാനത്താവളത്തിന്റെ വിപുലീകരണത്തിനായി 56 കോടി രൂപയുടെ മൂന്ന് പുതിയ പദ്ധതികൾ കൂടി ഉടൻ നടപ്പിലാക്കുമെന്നും അദ്ദേഹം പ്രഖ്യാപിച്ചു. നെടുമ്പാശ്ശേരിയെ ഒരു പ്രമുഖ എയർപോർട്ട് മെയിന്റനൻസ് ഹബ്ബായി മാറ്റുകയാണ് സർക്കാരിന്റെ ലക്ഷ്യം. സുരക്ഷയുടെ കാര്യത്തിൽ ലോകത്തിലെ ഏത് മികച്ച വിമാനത്താവളത്തോടും കിടപിടിക്കുന്ന അത്യാധുനിക സംവിധാനങ്ങളാണ് ഇവിടെ യാഥാർത്ഥ്യമാകുന്നതെന്നും അദ്ദേഹം പറഞ്ഞു. സിയാൽ എയ്റോപാർക്ക് യാഥാർത്ഥ്യമാകുന്നതോടെ ഏവിയേഷൻ അറ്റകുറ്റപ്പണികൾക്കും പരിശീലനങ്ങൾക്കും അന്താരാഷ്ട്ര തലത്തിലുള്ള കേന്ദ്രമായി കൊച്ചി മാറുമെന്നും മുഖ്യമന്ത്രി പ്രത്യാശ പ്രകടിപ്പിച്ചു.
About the Author
